《皇家特工》園性

食大餐、旅行、考試Pass以至大便暢通無阻都好，有人鍾意透過facebook、instagram記得最興奮的一刻，我鍾意寫字，例如剛剛睇咗一套好戲，一套唔止荷里活動作片咁簡單的戲。

你問10個睇過《皇家特工之間諜密令》（Kingsman: The Secret Service）的可能得到11個答案話正（其中一個睇兩次），用一句講的話故事老土到爆：有潛質後生仔子承父業成為特工拯救世界仲要同公主遨遊後花園。邊有咁簡單？（跟住3段屬於劇透）

⋯⋯

片中的男主角益仔（Gary “Eggsy”Unwin）阿爸係唔屬於任何國家任何政府的特工，一次意外為救另一位特工Harry Hart由哥連費夫（Colin Firth）飾演而壯烈犧性，哥連一直希望報恩，日後有咩意外即管開聲。益仔阿爸過身後同阿媽以及賤格繼父同住結果學壞，直至一次偷車闖禍動用哥連關係後可以被救出。

男主角係電影初頭只係一個聰明但無業、吸毒、犯事兼無名牌大學的廢青一條（有提佢海軍陸戰隊成績優異但為阿媽放棄），不過哥連對鏡問佢一句：「What do you see? I see a young man with potential」加上益仔一句「I have nothing to lose」（用廣東話版應該換成：「好呀，驚X丫」），結果益仔被推薦同其他8個人爭得一個位嘅特工。

劇中的壞蛋係曾經嘗試拯救地球免受污染摧毀的有錢佬Valentine（Samuel L. Jackson飾演），為救地球嘗試來一次人類滅絕自相殘殺，結果勾結一大堆政客聯合上演一場大屠殺，美其名為的是地球。結果當然是益仔成功拯救地球。

曾經與一位金像獎導演傾劇本創作，除了傳統地以90分鐘為本分9節描述劇情起承轉合外，最重要的是代入，即是大家俾錢睇戲大多數想化身成為劇中男女主角，英雄救美的救美，嫁得有情郎的嫁出等等，中港合拍片的話更加老土到暈邪不能勝正，最多壞警察的地方偏偏無壞警察。

《皇家特工》成功令入場的觀眾都投入、化身成為益仔，無論我有無錢出身如何，但天生我材必有用，千里馬終會遇到伯樂，結果益仔成為由小混混成為型到（Chok）到爆的特工，睇到男的羨慕女的蕩漾。而家仲好似TVB劇咁講讀好書成為出色的專業人士先媾到女？OUT了。

唔講唔知，飾演益仔的演員Taron Egerton同樣出身寒微，今年25歲（1989年11月10日出生）的他阿爸開B＆B旅館，阿媽係比較保守的社工，雖然佢畢業於英國皇家戲劇藝術學院兼攞Stephen Sondheim Society最佳學生表演獎，但佢中學只係讀一般勞工階級讀的綜合學校Ysgol Penglais Comprehensive schooh（英國中學分三級：分別係中產讀的文法學校、貴族讀的公校以及勞工階層讀的綜合學校），《皇家特工》可以話佢首部擔正的一級電影，結果一夜成名，相中佢的人叫Matthew Vaughn，亦即係《勁揪俠》（Kick Ass）的導演

呢位導演拍的戲都好觸動基層的心，好似Kiss Ass亦係由毒男鳩流流變無敵再警惡懲奸，搵無大片經驗的Taron Egerton Casting兼起用佢，心裡面諗起都係一句：「好呀，驚X丫」。

套戲雖然係講一個廢青如何飛上枝頭，但保留好多核心價值，例如善良有信用等等，導演係電影用3、4個detail位將男主角描述成為一個有愛心善良兼有義氣口密到爆的人，detail位包括因為一隻小動物而炒車被警察拉、跳降傘時先拉其救人、唔忍心殺死八哥通過試驗等等。

正如電影入面益仔的伯樂哥連所言：「Manners maketh man, do you know what that means?」觀其行，知其人。90後的後生仔俾人覺得點「廢」都好，核心價值一定要保留，因為你地一言一語都反映緊你係一個乜嘢嘅人。

最後電影仲有一句對白我好Like的是哥連引述海明威的名句：「There is nothing noble in being superior to your fellow man; true nobility is being superior to your former self.」比別人強不算高貴，比以前的自己強才算高貴。

贏完自己仲要遊花園。

園性，完勝。